បន្ទាយមានជ័យ៖ កម្លាំងនគរបាលខេត្តបន្ទាយមានជ័យ និងសមត្ថកិច្ចថែបានឃាត់ខ្លួនពលរដ្ឋខ្មែរដែលបំរុងលួចឆ្លងដែនសរុបជាង៦៤នាក់កាលពីម្សិលមិញ។
ស្នងការនគរបាលខេត្តបន្ទាយមានជ័យ លោកឧត្តមសេនីយ៍ទោ សិទ្ធ ឡោះ បានឱ្យEAC News ដឹងថា សមត្ថកិច្ចកម្ពុជា-ថៃបានឃាត់ខ្លួនពលករខ្មែរខុសច្បាប់ចំនួន២ករណីកាលពីថ្ងៃទី២៤ ខែតុលា ម្សិលមិញ ដោយករណីទីមួយឃាត់បាន៣២នាក់ក្នុងនោះស្រី១៧នាក់ ឃាត់បាននៅម៉ោង៤និង៣០នាទីល្ងាច នៅចំណុចខាងជើងមណ្ឌលយោធិនពិការ ភូមិតេជោភ្នំឆ័ត្រ ឃុំ/ស្រុកស្វាយចេក និងករណីមួយទៀតឃាត់បានមនុស្ស៣២នាក់ ក្នុងនោះស្រី១៦នាក់ ឃាត់បានក្នុងទឹកដីថៃ ក្នុងឃុំតាប្រាយ៉ា ស្រុកតាប្រាយ៉ា ខេត្តស្រះកែវ។
នៅពេលនេះពលរដ្ឋដែលត្រូវថៃឃាត់ខ្លួនបានមិនទាន់ត្រូវថៃបញ្ជូនមកវិញនៅឡើយទេបើទោះបីមានការស្នើសុំឱ្យបញ្ជូនមកវិញដោយអាជ្ញាធរកម្ពុជាក៏ដោយ ខណៈអ្នកដែលត្រូវអាជ្ញាធរខ្មែរឃាត់បានពេលនេះបានបញ្ជូនមកធ្វើចត្តាឡីស័កនៅក្នុងខេត្តបន្ទាយមានជ័យ៕
